Hvað meinar þú með ‘footer’? – Tækniorð vefheimsins útskýrð á mannamáli.
Header, hýsing og lendingarsíða? Það er ekkert skrítið að fólk ruglist þegar það vinnur í fyrsta sinn með vefhönnunarfólki – við notum nefnilega oft sértæk hugtök sem eru ekki sjálfskýr. Hér er einfaldur listi yfir algeng orð sem við hjá Lúpínu notum reglulega – og hvað þau raunverulega þýða.
Bygging vefsins
Header – Efsti hluti vefsins. Oft inniheldur hann lógó og valmynd (menu).
Footer – Neðsti hluti vefsins. Þar má oft finna tengla, samskiptaupplýsingar, vafrakökur o.fl.
Menu (valmynd) – Leiðarkerfi vefsins sem hjálpar notandanum að rata á milli síðna.
Undirsíður – Síður sem tilheyra meginflokk, t.d. „Um okkur“ eða „Þjónusta“.
Lendingarsíða (Landing Page) – Sérhönnuð síða fyrir tiltekið markmið, t.d. söluherferð eða skráningu. Hún hefur oft einbeittari uppsetningu og kallar notandann til aðgerða.
Skjástærðir og tæki
Desktop – Útgáfan af vefnum sem sést á hefðbundnum tölvuskjá.
Tablet – Útlit og virkni vefs á spjaldtölvu (t.d. iPad).
Mobile – Útlit og virkni á snjallsíma. Mikilvægt er að vefurinn virki vel á öllum skjám.
Tæknilegir hlutir
Responsiv vefur – Vefur sem aðlagar sig sjálfkrafa að mismunandi skjástærðum (sjá að ofan).
CMS (Content Management System) – Efnisumsjónarkerfi. WordPress er vinsælasta CMS kerfið í dag og það sem við hjá Lúpínu notum.
Hýsing (Hosting) – Geymsluplássið sem vefurinn þinn býr á, á netþjóni. Það þarf örugga og hraða hýsingu til að vefurinn virki vel.
SSL skírteini – Öryggisvottorð sem tryggir dulkóðuð samskipti við vefinn. Vefir með SSL byrja á „https://“ og sýna lásmerki.
Vefumsjón (Website Maintenance) – Viðhald vefsins eftir að hann fer í loftið: öryggisuppfærslur, bilanalagfæringar og breytingar á efni.
Efni og virkni
Hero banner / mynd – Stór mynd efst á forsíðu eða lendingarsíðu sem grípur athygli notandans.
CTA (Call To Action) – Hvatning til notandans um að framkvæma eitthvað: t.d. „Hafa samband“, „Skrá sig“ eða „Kaupa núna“.
Forms (eyðublöð) – Notað til að safna upplýsingum frá gestum, t.d. pöntun, skráning eða fyrirspurn.
Pop-up – Lítill gluggi sem birtist yfir síðunni, t.d. til að minna á tilboð eða hvetja til aðgerða.
Markaðs- og mælingatengd hugtök
SEO (Search Engine Optimization) – Leitarvélabestun. Felur í sér að stilla vefinn þannig að hann birtist ofarlega í leitarniðurstöðum Google.
Analytics – Tól eins og Google Analytics sem mælir umferð á vefnum, hegðun notenda o.s.frv.
Pixel – Lítill mælikóði (oft frá t.d. Facebook) sem fylgist með hegðun notenda til að styðja við markaðssetningu.
Mynd eftir Laurin Steffens á Unsplash
Þú þarft ekki að kunna öll orðin – við hjálpum þér að skilja þau
Það er ekki þitt hlutverk að kunna tækniorð – en það getur verið þægilegt að vita hvað við meinum þegar við tölum um „footer“ eða „lendingarsíðu“. Ef þú ert í samstarfi við okkur hjá Lúpínu, þá útskýrum við hlutina á mannamáli – og sjáum um flækjustigið fyrir þig.
👉 Hafðu samband ef þú vilt að við tökum að okkur vefinn þinn – með einfaldleika og öryggi í fyrirrúmi.
